talaatum mein kabhi utraa thaa 'asghar' — Asghar Shamim

shahr to kab kaa jal chukaa 'asghar'
uTh rahaa hai magar dhuaan ab tak

saari duniyaa ko jitne vaalaa
apne bachchon se haar jaataa hai

kahaan sar chhupaaein pataa hi nahin
ki girne lagi ghar ki divaar ab

sar pe dastaar jab salaamat hai
dil mein aati hui anaa se Dar

dil mein 'asghar' ke khushiyon ki barsaat thi
hanste hanste vo kyuun gham-zada ho gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa