na jaane kab koi aa kar miri takmil kar jaae — Ashar Najmi

andhere mein tajassus kaa taqaazaa chhoD jaanaa hai
kisi din khaamushi mein khud ko tanhaa chhoD jaanaa hai

rafta rafta khatm qissa ho gayaa honaa hi thaa
vo bhi aakhir mere jaisaa ho gayaa honaa hi thaa

zahr mein Duubi hui parchhaaiyon kaa raqs hai
khud se vaabasta yahaan main bhi nahin tu bhi nahin

canvas par hai ye kis kaa paikar-e-harf-o-sadaa
ik numud-e-aarzu jo be-nishaan hai aur bas

bahut mohtaat ho kar saans lenaa mo'tabar ho tum
hamaaraa kyaa hai ham to khud hi apni rad mein rahte hain

saunpoge apne baa'd viraasat mein kyaa mujhe
bachche kaa ye savaal hai gunge samaaj se

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

na jaane haar hai yaa jiit kyaa hai
ghamon par muskuraanaa aa gayaa hai

baandhaa thaa khud hi aap ne paighaam-e-iltifaat
kyaa baat thi jo aap hi khud bad-gumaan hue

abhi dikhaao na tasvir-e-zindagi is ko
ye bachpanaa hai abhi muskuraanaa chaahtaa hai