TuuTe hue log hain salaamat — Ashfaq Husain

tumhein manaane kaa mujh ko khayaal kyaa aae
ki apne aap se ruThaa huaa to main bhi huun

phuul mahkeinge yunhi chaand yunhi chamkegaa
tere hote hue manzar ko hasin rahnaa hai

main apni pyaas mein khoyaa rahaa khabar na hui
qadam qadam pe vo dariyaa pukaartaa thaa mujhe

jo khvaab ki dahliz talak bhi nahin aayaa
aaj us se mulaaqaat ki surat nikal aai

dil ki jaagir mein meraa bhi koi hissa rakh
main bhi teraa huun mujhe bhi to kahin rahnaa hai

talaash apni khud apne vajud ko kho kar
ye kaar-e-ishq hai is mein lagaa to main bhi huun

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

fikr o ehsaas ke tapte hue manzar tak aa
mere lafzon mein utar kar mire andar tak aa

jo mire sochne ki baatein hain
dusre sochte hain mere liye

apne dil-e-betaab se main khud huun pareshaan
kyaa duun tumhein ilzaam main kuchh soch rahaa huun

koi jaldi nahin hai soch lenaa
abhi inkaar ki gunjaaishein hain