phuul mahkeinge yunhi chaand yunhi chamkegaa — Ashfaq Husain

tumhein manaane kaa mujh ko khayaal kyaa aae
ki apne aap se ruThaa huaa to main bhi huun

main apni pyaas mein khoyaa rahaa khabar na hui
qadam qadam pe vo dariyaa pukaartaa thaa mujhe

jo khvaab ki dahliz talak bhi nahin aayaa
aaj us se mulaaqaat ki surat nikal aai

dil ki jaagir mein meraa bhi koi hissa rakh
main bhi teraa huun mujhe bhi to kahin rahnaa hai

bahut chhoTaa saa dil aur is mein ik chhoTi si khvaahish
so ye khvaahish bhi ab nilaam karne ke liye hai

talaash apni khud apne vajud ko kho kar
ye kaar-e-ishq hai is mein lagaa to main bhi huun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

jab bhi dekhi hai kisi chehre pe ik taaza bahaar
dekh kar main tiri tasvir puraani royaa

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain