jo khvaab ki dahliz talak bhi nahin aayaa — Ashfaq Husain

tumhein manaane kaa mujh ko khayaal kyaa aae
ki apne aap se ruThaa huaa to main bhi huun

phuul mahkeinge yunhi chaand yunhi chamkegaa
tere hote hue manzar ko hasin rahnaa hai

main apni pyaas mein khoyaa rahaa khabar na hui
qadam qadam pe vo dariyaa pukaartaa thaa mujhe

dil ki jaagir mein meraa bhi koi hissa rakh
main bhi teraa huun mujhe bhi to kahin rahnaa hai

bahut chhoTaa saa dil aur is mein ik chhoTi si khvaahish
so ye khvaahish bhi ab nilaam karne ke liye hai

talaash apni khud apne vajud ko kho kar
ye kaar-e-ishq hai is mein lagaa to main bhi huun

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

shab palang par haanpte saae rahe
khvaab darvaaze khaDaa taktaa rahaa

sab baDe zoam se aae the nae surat-gar
sab ke daaman se vahi khvaab puraane nikle

rakh liyaa thaa main ne roza jaan tumhaare naam kaa
tum ko dekhaa khvaab mein aur meri sehri ho gai

aaj ki shab khvaab mein baatein hui hain jin se meri
yaa-khudaa ik roz ho jaae mujhe didaar un kaa