vo lamhe-bhar ko tasavvur se bhi nahin jaataa — Asif Bilal

jaane lagtaa huun to vo paanv pakaD letaa hai
aur sitam ye hai ki siine se lagaataa bhi nahin

taraqqiyaat ki ye kaun si ghaDi hai jahaan
sab apne aap mein baazaar honaa chaahte hain

pech-dar-pech hui jaati hai duniyaa ham par
jaane kyon is pe ham aasaan hue jaate hain

ab bahut dasht-navardi hui 'aasif' saahab
ab badan maut ki aavaaz pe haan chaahtaa hai

ham aise log bahut der tak nahin rahte
yaqin jaaniye koi kamaal ho rahaa hai

ham ne jis haadse pe sabr kiyaa
aap hote to mar gae hote

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

ye shahr hai anjaan kahaan raat guzaarun
hai jaan-na-pahchaan kahaan raat guzaarun