rag-e-har-saaz ye kahti hai ki ai naghma-taraaz — Aslam Ansari

jaane vaale ko kahaan rok sakaa hai koi
tum chale ho to koi rokne vaalaa bhi nahin

divaar-e-khastagi huun mujhe haath mat lagaa
main gir paDungaa dekh mujhe aasraa na de

kise kahein ki rifaaqat kaa daagh hai dil par
bichhaDne vaalaa to khul kar kabhi milaa hi na thaa

khafaa na ho ki tiraa husn hi kuchh aisaa thaa
main tujh se pyaar na kartaa to aur kyaa kartaa

jise darpesh judaai ho use kyaa maalum
kaun si baat ko kis tarah bayaan honaa hai

ham ko pahchaan ki ai bazm-e-chaman-zaar-e-vajud
ham na hote to tujhe kis ne sanvaaraa hotaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

saath rakhiye kaam aaegaa bahut naam-e-khudaa
khauf gar jaagaa to phir kis ko sadaa di jaaegi

band kamre mein tiraa dard na bujh jaae kahin
khiDkiyaan khol ki ye aag havaa chaahti hai