main ek baab thaa afsaana-e-vafaa kaa magar — Hasan Naim

kam nahin ai dil-e-betaab mataa-e-ummid
dast-e-mai-khvaar mein khaali hi sahi jaam to hai

kuchh usulon kaa nasha thaa kuchh muqaddas khvaab the
har zamaane mein shahaadat ke yahi asbaab the

gham se bikhraa na paaemaal huaa
main to gham se hi be-misaal huaa

jo bhi kahnaa hai kaho saaf shikaayat hi sahi
in ishaaraat-o-kinaayaat se ji Dartaa hai

gard-e-shohrat ko bhi daaman se lipaTne na diyaa
koi ehsaan zamaane kaa uThaayaa hi nahin

'iqbaal' ki navaa se musharraf hai go 'naim'
urdu ke sar pe 'mir' ki ghazlon kaa taaj hai

maujud mere dil mein jo zakhmon ke daagh hain
vo ek bevafaa ke sitam ke charaagh hain

jaane kyaa soch ke ham tujh se vafaa karte hain
qarz hai pichhle janm kaa so adaa karte hain

dil-e-muztar vafaa ke baab mein ye jald-baazi kyaa
zaraa ruk jaaein aur dekhein natija kyaa nikaltaa hai

tufaan-e-gham ki tund havaaon ke baavajud
ik sham-e-aarzu hai jo ab tak bujhi nahin

kabhi to un ko hamaaraa khayaal aaegaa
ham is umiid pe tark-e-vafaa nahin karte

ye kahin umr-e-guzishta to nahin tum to nahin
koi phirtaa hai sar-e-shahr-e-vafaa aavaara