aae hain log raat ki dahliz phaand kar — Ata Ul Haq Qasmi

dilon se khauf nikaltaa nahin azaabon kaa
zamin ne oDh liye sar par aasmaan phir se

lagtaa nahin ki us se maraasim bahaal hon
main kyaa karun ki thoDaa saa paagal to main bhi huun

use ab bhuul jaane kaa iraada kar liyaa hai
bharosa ghaaliban khud par ziyaada kar liyaa hai

jis ki khaatir main bhulaa baiThaa thaa apne aap ko
ab usi ke bhuul jaane kaa hunar bhi dekhnaa

vo ek shakhs ki manzil bhi raastaa bhi hai
vahi duaa bhi vahi haasil-e-duaa bhi hai

ye kis azaab mein us ne phansaa diyaa mujh ko
ki us kaa dhyaan koi kaam karne detaa nahin

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

har ek shaakh pe viraaniyaan musallat hain
badan-darakht bhi goyaa hai aashiyaan-e-shab