khvaabon ki kirchiyaan miri muTThi mein bhar na jaae — Ateequllah

fazaa mein haath to uTThe the ek saath kai
kisi ke vaaste koi duaa na kartaa thaa

tum ne to faqat us ki rivaayat hi suni hai
ham ne vo zamaana bhi guzarte hue dekhaa

zaraa se rizq mein barkat bhi kitni hoti thi
aur ik charaagh se kitne charaagh jalte the

ye raah-e-talab yaaro gumraah bhi karti hai
saamaan usi kaa thaa jo be-sar-o-saamaan thaa

aaina aaina tairtaa koi aks
aur har khvaab mein dusraa khvaab hai

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

be-kaif kaT rahi thi musalsal ye zindagi
phir khvaab mein vo khvaab saa paikar milaa mujhe

aankhon ke khvaab dil ki javaani bhi le gayaa
vo apne saath meri kahaani bhi le gayaa

zindagi khud ko na is ruup mein pahchaan saki
aadmi lipTaa hai khvaabon ke kafan mein aisaa