gham-gusaari ke liye ab nahin aataa hai koi — Athar Nadir

aadmi kaa amal se rishta hai
kaam aataa nahin nasab kuchh bhi

kis darja mire shahr ki dilkash hai fazaa bhi
maanus har ik chiiz hai miTTi bhi havaa bhi

dekho to har ik rang se miltaa hai miraa rang
socho to har ik baat hai auron se judaa bhi

raat aangan mein chaand utraa thaa
tum mile the ki khvaab dekhaa thaa

ab aa bhi jaao ki ik dusre mein gum ho jaaein
visaal-o-hijr kaa qissa bahut puraanaa huaa

jo dekhiye to zamaana hai tez-rau kitnaa
tulu-e-subh abhi hai to vaqt-e-shaam abhi

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

main akelaa huun tu bhi tanhaa hai
ham bhi kitne hain be-sahaare dekh

sunti hai roz naghma-e-zanjir-e-aashiqaan
vo zulf bhi hai silsila-e-ahl-e-chisht mein