churaa ke laae hain kuchh log lafz ke moti — Atique Asar

masarrat aur gham donon ki koi had zaruri hai
kisi bhi ek shai kaa silsila achchhaa nahin lagtaa

qarib se na guzar intizaar baaqi rakh
qaraabaton kaa magar e'tibaar baaqi rakh

uThe jaate hain dida-var sabhi aahista aahista
ye duniyaa mo'tabar logon se khaali hoti jaati hai

vo baat mujh ko to dushnaam si lagi hai 'atiq'
tumhaaraa naam likhaa kis ne be-vafaaon mein

bichhaDnaa bhi tumhaaraa jite-ji ki maut hai goyaa
use kyaa khaak lutf-e-zindagi jis se judaa tum ho

udaas aankhon se aansu nahin nikalte hain
ye motiyon ki tarah sipiyon mein palte hain

allaah re zauq-e-dasht-navardi ki baad-e-marg
hilte hain khud-ba-khud mire andar kafan ke paanv

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

kisi ke ek ishaare mein kis ko kyaa na milaa
bashar ko ziist mili maut ko bahaana milaa

umr-bhar jis ke liye aankhein rahi hain farsh-e-raah
vo ajal kaa qaasid-e-farkhanda-gaam aa hi gayaa