dekhaa nahin jis ne mire tufaan ko sukun mein — Azhar Hashmi Sabqat

khudaa ki razaa hai na haasil kisi ko
khudaa ke liye par laDaai bahut hai

sajde kaa sabab jaan ke shirin hai pareshaan
farhaad ne kah Daalaa ke rab DhunD rahaa huun

jis khaak se kahte ho vafaa ham nahin karte
soe hain usi khaak mein sultaan hazaaron

ye jo behaal saa manzar ye jo bimaar se ham tum
siyaasat ki navaazish hai kisi se kuchh nahin bolein

ye tamannaa hai khudaa aalam-e-hasti mein tire
main ayaan dekhnaa chaahun to nihaan tak dekhun

kahin suraagh nahin hai kisi bhi qaatil kaa
lahuluhaan magar shahr kaa nazaara hai

vafaa par naaz ham ko un ko apni bevafaai par
koi munh aaine mein dekhtaa hai koi paani mein

bhuul kar bhi koi letaa nahin ab naam-e-vafaa
ishq is shahr mein gardan-zadani ho jaise

ye adaa-e-be-niyaazi tujhe bevafaa mubaarak
magar aisi be-rukhi kyaa ki salaam tak na pahunche

roz-e-visaal jis ko kahti hai khalq vo hi
mazhab mein aashiqon ke roz-e-vafaat bhi hai

ahl-e-vafaa se tark-e-taalluq kar lo par ik baat kahein
kal tum in ko yaad karoge kal tum inhein pukaaroge

aayaa hi thaa abhi mire lab pe vafaa kaa naam
kuchh doston ne haath mein patthar uThaa liye