ajab junun hai ye intiqaam kaa jazba — Azhar Inayati

ghazal kaa sher to hotaa hai bas kisi ke liye
magar sitam hai ki sab ko sunaanaa paDtaa hai

shikastagi mein bhi kyaa shaan hai imaarat ki
ki dekhne ko ise sar uThaanaa paDtaa hai

raasto kyaa hue vo log ki aate-jaate
mere aadaab pe kahte the ki jiite rahiye

kisi ke aib chhupaanaa savaab hai lekin
kabhi kabhi koi parda uThaanaa paDtaa hai

vo jis ke sehn mein koi gulaab khil na sakaa
tamaam shahr ke bachchon se pyaar kartaa thaa

har ek raat ko mahtaab dekhne ke liye
main jaagtaa huun tiraa khvaab dekhne ke liye

hansiye charaagh ujaaliye paude lagaaiye
kuchh hausla baDhaaiye buDhi zamin kaa

us bevafaa kaa shahr hai aur vaqt-e-shaam hai
aaise mein aarzu baDi himmat kaa kaam hai

khud pe kyaa biit gai itne dinon mein tujh bin
ye bhi himmat nahin ab jhaank ke andar dekhun

haqiqatein to aTal hain badal nahin saktin
magar kisi ki tasalli se hausla huaa hai

nahin maalum kitne ho chuke hain imtihaan ab tak
magar tere vafaadaaron ki himmat hai javaan ab tak

lazzat-e-gham to bakhsh di us ne
hausle bhi 'adam' diye hote