us bevafaa kaa shahr hai aur vaqt-e-shaam hai — Shuja Khaavar

'shujaa' vo khairiyat puchhein to hairat mein na paD jaanaa
pareshaan karne vaale khair-khvaahon mein bhi hote hain

chaaragari ki baat kisi aur se karo
ab ho gae hain yaaro puraane mariz ham

us ke bayaan se hue har-dil-aziz ham
gham ko samajh rahe the chhupaane ki chiiz ham

tangi-e-haiat se Takraataa huaa josh-e-mavaad
shaaeri kaa lutf aa jaataa hai chhoTi bahr mein

yaa to jo naa-fahm hain vo bolte hain in dinon
yaa jinhein khaamosh rahne ki sazaa maalum hai

do chaar nahin sainkaDon sher us pe kahe hain
is par bhi vo samjhe na to qadmon pe jhukein kyaa

lazzat-e-gham to bakhsh di us ne
hausle bhi 'adam' diye hote

tu samajhtaa hai gar fuzul mujhe
kar ke himmat zaraa saa bhuul mujhe

hijr ko hausla aur vasl ko fursat darkaar
ik mohabbat ke liye ek javaani kam hai

ji bahut chaahtaa hai sach bolein
kyaa karein hausla nahin hotaa

piiri mein shauq hausla-farsaa nahin rahaa
vo dil nahin rahaa vo zamaana nahin rahaa

aaine par koi tohmat na dharo
khaal-o-khad apne sanvaaro saahab