haqiqatein to aTal hain badal nahin saktin — Khalida Uzma

ki mire baa'd qatl se tauba
aakhiri tiir thaa kamaan mein kyaa

idhar udhar ke sunaae hazaar afsaane
dilon ki baat sunaane kaa hausla na huaa

chale aate hain be-mausam ki baarish ki tarah aansu
basaa-auqaat rone kaa sabab kuchh bhi nahin hotaa

ziist aur maut kaa aakhir ye fasaana kyaa hai
umr kyuun hasb-e-zarurat nahin di jaa sakti

basi hai sukhe gulaabon ki baat saanson mein
koi khayaal kisi yaad ke hisaar mein hai

vo tapish hai ki jal uThe saae
dhuup rakkhi thi saaebaan mein kyaa

havaa ke saath safar kaa na hausla thaa jise
sabhi ko khauf usi lamha-e-sharar se thaa

fazaa mein guunj rahi hain kahaaniyaan gham ki
hamin ko hausla-e-sharh-e-daastaan na rahaa

hausla hai to safinon ke alam lahraao
bahte dariyaa to chaleinge isi raftaar ke saath

kyuun tire dard ko dein tohmat-e-viraani-e-dil
zalzalon mein to bhare shahr ujaD jaate hain

ji bahut chaahtaa hai sach bolein
kyaa karein hausla nahin hotaa

abhi mujh mein bahut himmat hai lekin
kisi haare hue lashkar mein huun main