phir ret ke dariyaa pe koi pyaasaa musaafir — Azhar Naqvi

khvaab muTThi mein liye phirte hain sahraa sahraa
ham vahi log hain jo dhuup ke par kaaTte hain

ab to mujh ko bhi nahin milti miri koi khabar
kitnaa gumnaam huaa huun main numaayaan ho kar

raat bhar chaand se hoti rahein teri baatein
raat khole hain sitaaron ne tire raaz bahut

ek ik saans mein sadiyon kaa safar kaaTte hain
khauf ke shahr mein rahte hain so Dar kaaTte hain

dukh safar kaa hai ki apnon se bichhaD jaane kaa gham
kyaa sabab hai vaqt-e-rukhsat ham-safar khaamosh hain

ajab hairat hai akasr dekhtaa hai mere chehre ko
ye kis naa-aashnaa kaa aaine mein aks rahtaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

jis ko chaahaa bas usi kaa raasta takte rahe
pattharon ki justuju mein khud ko patthar kar liyaa