azaab hoti hain aksar shabaab ki ghaDiyaan — Badr Wasti

aaj-kal to sab ke sab Tv ke divaane hue
varna bachche to liyaa karte the paagal ke maze

har shakhs ko gumaan ki manzil nahin hai duur
ye to bataaiye ki pata kis ke paas hai

qaatil ki saari saazishein naakaam hi rahin
chehra kuchh aur khil uThaa zahraab gar piyaa

lahu kaa aakhiri qatra nichoDne par bhi
taqaaze reingte rahte hain rang-o-bu ke liye

phaldaar darakhton ne rijhaayaa to mujhe bhi
aazaad parindon ke liye shaakh-o-samar kyaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

rok do ye raushni ki tez dhaar
meri miTTi mein gundhi hai raat bhi

us se hi to chalte hain kaarobaar gulshan ke
vo hi raat-raani hai vo hi gul-hazaara hai

koi kyaa bataae ki ziist mein na kashish rahi na mazaa rahaa
jo guzar gayaa vo shabaab thaa jo bikhar gayaa vo jamaal thaa