'taahira' talkhi-e-dauraan ki sharaab-e-rangin — Bano Tahira Sayeed

kaarvaan jin kaa luTaa raah mein aazaadi ki
qaum kaa mulk kaa un dard ke maaron ko salaam

taDapnaa gungunaanaa aah bharnaa dasht-paimaai
dil-e-shaair ki kuchh ranginiyaan hain mere hisse mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa