jise manzil samajh kar ruk gae ham — Bashir Mehtaab

zindagi fan nahin madaari kaa
paaniyon se diye nahin jalte

hasin yaadein vo bachpan ki kahin dil se na kho jaaein
main apne aashiyaane mein khilaune ab bhi rakhtaa huun

ik bevafaa ke pyaar mein had se guzar gae
kaafir ke pyaar ne hamein kaafir banaa diyaa

apni kamar se aap hi baandhe safar tamaam
phir yuun huaa ki main kabhi apnaa nahin banaa

yuun mohabbat ko umr-bhar paDhnaa
zindagi imtihaan ho jaise

tum mire paas jab nahin hote
dhaDkanein ehtijaaj karti hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

apni shokhi se na baaz aae tum ab bhi 'hammaad'
shaikh se puchh liyaa raasta mai-khaane kaa

raah-e-talab mein daam-o-diram chhoD jaaeinge
likh lo hamaare sher baDe kaam aaeinge