apni kamar se aap hi baandhe safar tamaam — Bashir Mehtaab

zindagi fan nahin madaari kaa
paaniyon se diye nahin jalte

hasin yaadein vo bachpan ki kahin dil se na kho jaaein
main apne aashiyaane mein khilaune ab bhi rakhtaa huun

ik bevafaa ke pyaar mein had se guzar gae
kaafir ke pyaar ne hamein kaafir banaa diyaa

yuun mohabbat ko umr-bhar paDhnaa
zindagi imtihaan ho jaise

jise manzil samajh kar ruk gae ham
vahin se apnaa aaghaaz-e-safar thaa

tum mire paas jab nahin hote
dhaDkanein ehtijaaj karti hain

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi