agar maujein Dubo detin to kuchh taskin ho jaati — Divakar Rahi

ain-fitrat hai ki jis shaakh pe phal aaeinge
inkisaari se vahi shaakh lachak jaaegi

bahut aasaan hai do ghunT pi lenaa to ai 'raahi'
baDi mushkil se aate hain magar aadaab-e-mai-khaana

sochne ki ye baat hai 'raahi'
sochte hi rahe to kyaa hogaa

ab to utni bhi mayassar nahin mai-khaane mein
jitni ham chhoD diyaa karte the paimaane mein

vaqt barbaad karne vaalon ko
vaqt barbaad kar ke chhoDegaa

abas ilzaam mat do mushkilaat-e-raah ko 'raahi'
tumhaare hi iraade mein kami maalum hoti hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

aadat ke baa'd dard bhi dene lagaa mazaa
hans hans ke aah aah kiye jaa rahaa huun main

naaz kar naaz tire naaz pe hai naaz mujhe
meri tanhaai hai partav tiri yaktaai kaa

hijr ki shab naala-e-dil vo sadaa dene lage
sunne vaale raat kaTne ki duaa dene lage