chhin leti hai aadmi kaa vaqaar — Dr. Jafar Askari

mullaa tiri akaD se ye hone lagaa gumaan
jaise khudaa zamin pe numudaar ho gayaa

niind aati hi nahin thi aagahi ke dard se
maut ne aaghosh mein le kar sulaayaa hai mujhe

miT jaaegi vatan se jahaalat ki tirgi
vo dekh inqalaab kaa suraj qarib hai

ik maan ke dam se ziist mein raunaq thi barqaraar
ab vo nahin to raunaq-e-bazm-e-jahaan nahin

mazhab se us ke dil mein na paidaa huaa gudaaz
ye aadmi to aur bhi saffaak ho gayaa

barsaat muflison ki sadaa se raqib hai
kachche makaan girne kaa mausam 'ajib hai

jab ki pahlu se yaar uThtaa hai
dard be-ikhtiyaar uThtaa hai

khizr se kah do ki aa kar dekh lein aab-e-hayaat
dhoe jaate hain nichoDe jaaeinge gesu-e-dost

baad mein rakhe saraabon ke dayaaron mein qadam
pahle vo saans ki sarhad pe to aa kar dekhe

jo chaahtaa hai ki ban jaae vo baDaa shaaer
vo jaa ke dosti gaanThe kisi mudir ke saath

zamaana dosti par in hasinon ki na itraae
ye aalam-dost aksar dushman-e-aalam bhi hote hain

sahraa pe buraa vaqt mire yaar paDaa hai
divaana kai roz se bimaar paDaa hai