jahaan pe Duub gayaa meri aas kaa suraj — Ejaz Rahmani

vo ek pal ki rifaaqat bhi kyaa rifaaqat thi
jo de gai hai mujhe umar bhar ki tanhaai

abhi se paanv ke chhaale na dekho
abhi yaaro safar ki ibtidaa hai

taalaab to barsaat mein ho jaate hain kam-zarf
baahar kabhi aape se samundar nahin hotaa

guzar rahaa huun main saudaa-garon ki basti se
badan pe dekhiye kab tak libaas rahtaa hai

khil rahe hain gulaab zakhmon ke
shukriya aap ki navaazish kaa

fitrat ke taqaaze kabhi badle nahin jaate
khushbu hai agar vo to bikharnaa hi paDegaa

aap daaman ko sitaaron se sajaae rakhiye
meri qismat mein to patthar ke sivaa kuchh bhi nahin

koi zamin hai to koi aasmaan hai
har shakhs apni zaat mein ik daastaan hai

in sitaaron mein kahin tum bhi ho
in nazaaron mein kahin main bhi huun

nazar mili to nazaaron mein baanT di main ne
ye raushni bhi sitaaron mein baanT di main ne

ye aarzu ke sitaare ye intizaar ke phuul
chamak rahi hain khataaein mahak rahe hain gunaah

us ki palkon pe jo chamkaa thaa sitaara koi
dekhte dekhte mahtaab huaa jaataa hai