us ki palkon pe jo chamkaa thaa sitaara koi — Kausar Mazhari

mausam-e-dil jo kabhi zard saa hone lag jaae
apnaa dil khuun karo phuul ugaane lag jaao

giraa thaa bojh koi sar se mere
usi ko phir uThaanaa chaahtaa huun

vahi qatra jo kabhi kunj-e-sar-e-chashm mein thaa
ab jo phailaa hai to sailaab huaa jaataa hai

jaane kis khvaab-e-pareshaan kaa hai chakkar saaraa
bikhraa bikhraa huaa rahtaa hai miraa ghar saaraa

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

putliyon par raqs karnaa hi kalaam-e-fan nahin
dard ke aansu ko to paiham ravaani chaahiye

ubhar rahe hain kai haath shab ke parde se
koi sitaara liye koi maahtaab liye

bane hain ek sitaare ki khaak se shaayad
ki donon raqs mein rahte hain aur saakin hain

sau iid agar zamaane mein laae falak va-lek
ghar se hamaare maah-e-muharram na jaaegaa

falak ne bhi na Thikaanaa kahin diyaa ham ko
makaan ki niiv zamin se haTaa ke rakkhi thi

mujhe rahnaa thaa tiri aankh mein aansu ki tarah
main to naakaam huun ai dost sitaara ban kar

ye kis hisaab se ki tu ne raushni taqsim
sitaare mujh ko mile maahtaab us kaa thaa