in sitaaron mein kahin tum bhi ho — Kashif Husain Ghair

na ham vahshat mein apne ghar se nikle
na sahraa apni viraani se niklaa

bane hain kaam sab uljhan se mere
yahi atvaar hain bachpan se mere

zindagi mein kasak zaruri thi
ye khalaa pur tiri kami se huaa

haal puchhaa na kare haath milaayaa na kare
main isi dhuup mein khush huun koi saaya na kare

kyaa chaahti hai ham se hamaari ye zindagi
kyaa qarz hai jo ham se adaa ho nahin rahaa

mere andar kaa shor hai mujh mein
varna baahar to khaamushi hai yahaan

aansu falak ki aankh se Tapke tamaam raat
aur subh tak zamin kaa aanchal bhigo gae

falak detaa hai jin ko 'aish un ko gham bhi hote hain
jahaan bajte hain naqqaare vahaan maatam bhi hote hai

mahlon mein ham ne kitne sitaare sajaa diye
lekin zamin se chaand bahut duur ho gayaa

khaDaa huun zer-e-falak gumbad-e-sadaa mein 'munir'
ki jaise haath uThaa ho koi duaa ke liye

is jabin-e-araq-afshaan pe na chuniye afshaan
ye sitaare kahin mil jaaein na sayyaaron mein

hazaar raaste badle hazaar svaang rache
magar hai raqs mein sar par ik aasmaan vahi