aap ne jis ko farishte kaa diyaa thaa darja — Euphonic Amit

hijr mein shiddat dikhaate hain sabhi 'aashiq magar
lutf tab hai vasl ho par aarzu baaqi rahe

umidon se karo aazaad aur phir
mohabbat ki sanam parvaaz dekho

jo haqiqat se khauf khaane lage
khvaab aise main dekhtaa hi nahin

jo auron ko uDte hue dekhtaa ho
vo pinjre mein kaise sukun se rahegaa

mire qalam ki siyaahi mein 'ishq hai teraa
miraa ye naam ye shohrat tiri badaulat hai

naache hai mohabbat ki ye sur taal pe khud hi
dil ko ye hunar yaar sikhaayaa nahin jaataa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

idhar vo sahraa mein khaak dhuntaa udhar vo dariyaa kinaare gum-sum
ajiib hote hain ye ta'alluq musaafiron ke musaafiron se

ai naqsh-gar yaqin kar achchhaa nahin banaa
laa phir se kaaenaat kaa naqsha banaaun main

pathraai aankhon mein dekho kyaa kyaa rang dikhaataa aansu
Thahar gayaa to ik qatra saa bah niklaa to dariyaa aansu

kidhar Dubo ke kahaan par ubhaartaa hai tu
ye kaisaa rang hai dariyaa tiri ravaani kaa

hamein ranjish nahin dariyaa se koi
salaamat gar rahe sahraa hamaaraa