jo haqiqat se khauf khaane lage — Euphonic Amit

hijr mein shiddat dikhaate hain sabhi 'aashiq magar
lutf tab hai vasl ho par aarzu baaqi rahe

umidon se karo aazaad aur phir
mohabbat ki sanam parvaaz dekho

aap ne jis ko farishte kaa diyaa thaa darja
us ki insaanon si fitrat hai to hairat kyaa hai

jo auron ko uDte hue dekhtaa ho
vo pinjre mein kaise sukun se rahegaa

mire qalam ki siyaahi mein 'ishq hai teraa
miraa ye naam ye shohrat tiri badaulat hai

naache hai mohabbat ki ye sur taal pe khud hi
dil ko ye hunar yaar sikhaayaa nahin jaataa

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

kaaba o but-khaana aarif ki nazar se dekhiye
khvaab donon ek hi hain farq hai taabir mein

khvaabon se na jaao ki abhi raat bahut hai
pahlu mein tum aao ki abhi raat bahut hai