hijr mein shiddat dikhaate hain sabhi 'aashiq magar — Euphonic Amit

umidon se karo aazaad aur phir
mohabbat ki sanam parvaaz dekho

jo haqiqat se khauf khaane lage
khvaab aise main dekhtaa hi nahin

aap ne jis ko farishte kaa diyaa thaa darja
us ki insaanon si fitrat hai to hairat kyaa hai

jo auron ko uDte hue dekhtaa ho
vo pinjre mein kaise sukun se rahegaa

mire qalam ki siyaahi mein 'ishq hai teraa
miraa ye naam ye shohrat tiri badaulat hai

naache hai mohabbat ki ye sur taal pe khud hi
dil ko ye hunar yaar sikhaayaa nahin jaataa

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ek khvaahish hai jo shaayad umr bhar puuri na ho
ek sapne se hamesha pyaar karnaa hai mujhe

is andhere mein charaagh-e-khvaab ki khvaahish nahin
ye bhi kyaa kam hai ki thoDi der so jaataa huun main

ye log kis ki taraf dekhte hain hasrat se
vo kaun hai jo samundar ke paar rahtaa hai

hazaaron tamannaaon ke khuun se ham ne
kharidi hai ik tohmat-e-paarsaai