yahi sab log hain in sab ne miraa qatl kiyaa — Faisal Fehmi

kisi fard-e-mohabbat se bhalaa ummid kyaa rakhnaa
mohabbat bevafaa thi bevafaa hai bevafaa hogi

pahle tamaam shahr ko sahraa banaaeinge
phir vahshaton ki ret pe soyaa kareinge ham

taa-umr tifl-e-dil pe yatimi kaa karb thaa
koshish to ki magar main kabhi maan na ban sakaa

main apne aap kaa sab se baDaa mukhaalif huun
miri hi tarah kaa ik shakhs aur hai mujh mein

taarik saraabon ki chakaa-chaund mein gum-sum
thaa sakht musalmaan main imaan se pahle

bahtaa rahaa main saahil-e-duniyaa ki ret par
aakhir badan ki khaak sameTi to ghar gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

gul kiyaa jis ne vo thaa aur magar
shama ne shikva havaaon se kiyaa

shabaab kar diyaa meraa tabaah ulfat ne
khizaan ke haath ki boi hui bahaar huun main

thaa shaakh par gulaab baDi shaan se magar
juuDe mein tere aur tarahdaar ho gayaa