taarik saraabon ki chakaa-chaund mein gum-sum — Faisal Fehmi

kisi fard-e-mohabbat se bhalaa ummid kyaa rakhnaa
mohabbat bevafaa thi bevafaa hai bevafaa hogi

yahi sab log hain in sab ne miraa qatl kiyaa
ye miri qabr ko phulon se sajaane vaale

pahle tamaam shahr ko sahraa banaaeinge
phir vahshaton ki ret pe soyaa kareinge ham

taa-umr tifl-e-dil pe yatimi kaa karb thaa
koshish to ki magar main kabhi maan na ban sakaa

main apne aap kaa sab se baDaa mukhaalif huun
miri hi tarah kaa ik shakhs aur hai mujh mein

bahtaa rahaa main saahil-e-duniyaa ki ret par
aakhir badan ki khaak sameTi to ghar gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi