maut kaa intizaar baaqi hai — Fani Badayuni

yuun na qaatil ko jab yaqin aayaa
ham ne dil khol kar dikhaai choT

vahm-o-qayaas ke sivaa haasil-e-hosh kuchh nahin
fahm ki ibtidaa hai vahm aql ki had qayaas hai

har nafas umr-e-guzishta ki hai mayyat 'faani'
zindagi naam hai mar mar ke jiye jaane kaa

har musibat kaa diyaa ek tabassum se javaab
is tarah gardish-e-dauraan ko rulaayaa main ne

maujon ki siyaasat se maayus na ho 'faani'
girdaab ki har tah mein saahil nazar aataa hai

yaa-rab tiri rahmat se maayus nahin 'faani'
lekin tiri rahmat ki taakhir ko kyaa kahiye

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

ghazab kiyaa tire vaade pe e'tibaar kiyaa
tamaam raat qayaamat kaa intizaar kiyaa

aisi hi intizaar mein lazzat agar na ho
to do ghaDi firaaq mein apni basar na ho

tum aae ho na shab-e-intizaar guzri hai
talaash mein hai sahar baar baar guzri hai

ye jo mohlat jise kahe hain umr
dekho to intizaar saa hai kuchh