ishq akhbaar kab kaa band huaa — Farhat Ehsas

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

ilaaj apnaa karaate phir rahe ho jaane kis kis se
mohabbat kar ke dekho naa mohabbat kyuun nahin karte

main ronaa chaahtaa huun khuub ronaa chaahtaa huun main
phir us ke baad gahri niind sonaa chaahtaa huun main

vo aql-mand kabhi josh mein nahin aataa
gale to lagtaa hai aaghosh mein nahin aataa

har gali kuche mein rone ki sadaa meri hai
shahr mein jo bhi huaa hai vo khataa meri hai

koi dariyaa ki taraf jaane ko tayyaar nahin
haath sab ke hain magar koi 'alam-daar nahin

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

yaa tere alaava bhi kisi shai ki talab hai
yaa apni mohabbat pe bharosaa nahin ham ko

havaa par hai ye buniyaad-e-musaafir khaana-e-hasti
na Thahraa hai koi yaan ai dil-e-mahzun na Thahregaa

hichkiyaan aati hain kyuun ai dil-e-naashaad mujhe
shaayad us shokh ne bhule se kiyaa yaad mujhe

main aur tum se tark-e-mohabbat ki aarzu
divaana kar diyaa hai gham-e-rozgaar ne