main us ki baaton mein gham apnaa bhuul jaataa magar — Faryad Aazar

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

is tamaashe kaa sabab varna kahaan baaqi hai
ab bhi kuchh log hain zinda ki jahaan baaqi hai

subh hoti hai to daftar mein badal jaataa hai
ye makaan raat ko phir ghar mein badal jaataa hai

jo duur rah ke uDaataa rahaa mazaaq miraa
qarib aayaa to royaa gale lagaa ke mujhe

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa

ham ibtidaa hi mein pahunche the intihaa ko kabhi
ab intihaa mein bhi hain ibtidaa se lipTe hue

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ye saal tul-e-masaafat se chuur chuur gayaa
ye ek saal to guzraa hai ik sadi ki tarah

aadat ke baa'd dard bhi dene lagaa mazaa
hans hans ke aah aah kiye jaa rahaa huun main

hijr ki shab naala-e-dil vo sadaa dene lage
sunne vaale raat kaTne ki duaa dene lage