jo duur rah ke uDaataa rahaa mazaaq miraa — Faryad Aazar

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

main us ki baaton mein gham apnaa bhuul jaataa magar
vo shakhs rone lagaa khud hansaa hansaa ke mujhe

is tamaashe kaa sabab varna kahaan baaqi hai
ab bhi kuchh log hain zinda ki jahaan baaqi hai

subh hoti hai to daftar mein badal jaataa hai
ye makaan raat ko phir ghar mein badal jaataa hai

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa

ham ibtidaa hi mein pahunche the intihaa ko kabhi
ab intihaa mein bhi hain ibtidaa se lipTe hue

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

meraa azm itnaa buland hai ki paraae sholon kaa Dar nahin
mujhe khauf aatish-e-gul se hai ye kahin chaman ko jalaa na de

miri zindagi pe na muskuraa mujhe zindagi kaa alam nahin
jise tere gham se ho vaasta vo khizaan bahaar se kam nahin