baDhaanaa haath pakaDne ko rang muTThi mein — Fayyaz Farooqi

tujh se dil mein jo gila thaa vo na laae lab par
phir se ham bhar gae zakhmon ko haraa kyaa karte

jab un ki bazm mein har khaas o aam rusvaa hai
ajiib kyaa hai agar meraa naam rusvaa hai

ye sochaa hai ki tujh ko sochnaa ab chhoD dungaa main
ye laghzish mujh se lekin be-iraada ho hi jaati hai

raah mein us ki chalein aur imtihaan koi na ho
kaise mumkin hai ki aatish ho dhuaan koi na ho

jugnu havaa mein le ke ujaale nikal paDe
yuun tirgi se laDne jiyaale nikal paDe

kaise mumkin hai ki qisse jis se sab vaabasta hon
vo chale aur saath us ke daastaan koi na ho

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ajab tarah se guzaari hai zindagi ham ne
jahaan mein rah ke na kaar-e-jahaan ko pahchaanaa

khud apne gham hi se ki pahle dosti ham ne
aur us ke baa'd gham-e-dostaan ko pahchaanaa

kis se karun main apni tabaahi kaa ab gila
khud hi kamaan-ba-dast huun khud hi shikaar main