aql mein yuun to nahin koi kami — Firaq Gorakhpuri

tiraa visaal baDi chiiz hai magar ai dost
visaal ko miri duniyaa-e-aarzu na banaa

samajhnaa kam na ham ahl-e-zamin ko
utarte hain sahife aasmaan se

tire pahlu mein kyuun hotaa hai mahsus
ki tujh se duur hotaa jaa rahaa huun

ek muddat se tiri yaad bhi aai na hamein
aur ham bhuul gae hon tujhe aisaa bhi nahin

bahut pahle se un qadmon ki aahaT jaan lete hain
tujhe ai zindagi ham duur se pahchaan lete hain

sunte hain ishq naam ke guzre hain ik buzurg
ham log bhi faqir usi silsile ke hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

ye ilm kaa saudaa ye risaale ye kitaabein
ik shakhs ki yaadon ko bhulaane ke liye hain

aur phir mohabbat mein ji ke mar ke dekhaa hai
log sochte hain jo ham ne kar ke dekhaa hai

had se baDhe jo ilm to hai jahl dosto
sab kuchh jo jaante hain vo kuchh jaante nahin

yaa main sochun kuchh bhi na us ke baare mein
yaa aisaa ho duniyaa aur badal jaae