asar bhi le rahaa huun teri chup kaa — Firaq Gorakhpuri

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

kam se kam maut se aisi mujhe ummid nahin
zindagi tu ne to dhoke pe diyaa hai dhoka

bahut dinon mein mohabbat ko ye huaa maalum
jo tere hijr mein guzri vo raat raat hui

kisi kaa yuun to huaa kaun umr bhar phir bhi
ye husn o ishq to dhokaa hai sab magar phir bhi

jo uljhi thi kabhi aadam ke haathon
vo gutthi aaj tak suljhaa rahaa huun

chhuT ke ghar aa gae asiir tire
lekin ab in ko kaun pahchaane

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

chupke chupke vo paDh rahaa hai mujhe
dhire dhire badal rahaa huun main

kai sitaaron ko main jaantaa huun bachpan se
kahin bhi jaaun mire saath saath chalte hain

kyaa kah diyaa ye aap ne chupke se kaan mein
dil kaa sambhaalnaa mujhe dushvaar ho gayaa

baDaa maza ho jo mahshar mein ham karein shikva
vo minnaton se kahein chup raho khudaa ke liye