bahut dinon mein mohabbat ko ye huaa maalum — Firaq Gorakhpuri

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

kam se kam maut se aisi mujhe ummid nahin
zindagi tu ne to dhoke pe diyaa hai dhoka

kisi kaa yuun to huaa kaun umr bhar phir bhi
ye husn o ishq to dhokaa hai sab magar phir bhi

jo uljhi thi kabhi aadam ke haathon
vo gutthi aaj tak suljhaa rahaa huun

qafas vaalon ki bhi kyaa zindagi hai
chaman duur aashiyaan duur aasmaan duur

chhuT ke ghar aa gae asiir tire
lekin ab in ko kaun pahchaane

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

vo bhi hamaare naam se begaane ho gae
ham ko bhi sach hai un se mohabbat nahin rahi

aisaa nahin ki un se mohabbat na ho magar
pahle saa josh pahle si shiddat nahin rahi

mohabbat ki bhi kyaa hotin nahin ai ham-nashin raahein
ki khubaan yuun hamein dukh dein, ham un ko is tarah chaahein