ye zillat-e-ishq tere haathon — Firaq Gorakhpuri

chhuT ke ghar aa gae asiir tire
lekin ab in ko kaun pahchaane

kam se kam maut se aisi mujhe ummid nahin
zindagi tu ne to dhoke pe diyaa hai dhoka

bahut dinon mein mohabbat ko ye huaa maalum
jo tere hijr mein guzri vo raat raat hui

kisi kaa yuun to huaa kaun umr bhar phir bhi
ye husn o ishq to dhokaa hai sab magar phir bhi

jo uljhi thi kabhi aadam ke haathon
vo gutthi aaj tak suljhaa rahaa huun

main muddaton jiyaa huun kisi dost ke baghair
ab tum bhi saath chhoDne ko kah rahe ho khair

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

jhuTaa samaaj rasm-o-rivaayaat sarhadein
ab bhi hain raah-e-ishq mein divaar ki tarah

bastiyon vaale to khud oDh ke patte, soe
dil-e-aavaara tujhe raat sambhaalaa kis ne

nafrat se mohabbat ko sahaare bhi mile hain
tufaan ke daaman mein kinaare bhi mile hain

raaz-e-gham-e-ulfat ko ye duniyaa na samajh le
aansu mire daaman mein tumhaare bhi mile hain