phir mujhe yaad aaegaa bachpan — Govind Gulshan

pahle talaash kijiye manzil ki rahguzar
phir sochiye ki raah mein divaar kaun hai

zid par aDe hue hain ye dil bhi dimaagh bhi
ab dekhnaa hai in mein asar-daar kaun hai

rahguzar hai udaas meri tarah
jaane kab vo yahaan se guzregaa

zehn aur dil mein jo an-ban hai vo an-ban na rahe
is liye darmiyaan divaar banaa rakkhi hai

ek mushkil ho to aasaan banaa li jaae
us ne to zindagi dushvaar banaa rakkhi hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

sayyaad teraa ghar mujhe jannat sahi magar
jannat se bhi sivaa mujhe raahat chaman mein thi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

phir mujhe dida-e-tar yaad aayaa
dil jigar tishna-e-fariyaad aayaa