dil kaa har zakhm tiri yaad kaa ik phuul bane — Gulnar Aafreen

kyaa baat hai kyuun shahr mein ab ji nahin lagtaa
haalaanki yahaan apne paraae bhi vahi hain

shaayad abhi kami si masihaaiyon mein hai
jo dard hai vo ruuh ki gahraaiyon mein hai

saudaa hai zamiron kaa har gaam tijaarat hai
chup huun to qayaamat hai bolun to baghaavat hai

kin shahidon ke lahu ke ye farozaan hain charaagh
raushni si jo hai zindaan ke har ik rauzan mein

ek parchhaain tasavvur ki mire saath rahe
main tujhe bhulun magar yaad mujhe tu aae

'gulnaar' maslahat ki zabaan mein na baat kar
vo zahr pi ke dekh jo sachchaaiyon mein hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

itni saari yaadon ke hote bhi jab dil mein
viraani hoti hai to hairaani hoti hai

sazaa-e-maut pe fariyaad se to behtar hai
gale lagaa ke kahun daar ko mubaarak baad

ujli ujli khvaahishon par niind ki chaadar na Daal
yaad ke rauzan se kuchh taaza havaa bhi aaegi

ujaaD ho bhi chukaa miraa dil magar abhi daaghdaar bhi hai
yahi khizaan thi bahaar-dushman jo yaadgaar-e-bahaar bhi hai