bazm ko rang-e-sukhan main ne diyaa hai 'akhgar' — Haneef Akhgar

puchhti rahti hai jo qaisar-o-kisraa kaa mizaaj
shaan ye khaak-nashinon mein kahaan se aai

hasin surat hamein hamesha hasin hi maalum kyuun na hoti
hasin andaaz-e-dil-navaazi hasin-tar naaz barhami kaa

kushta-e-zabt-e-fughaan naghma-e-be-saaz-o-sadaa
uf vo aansu jo lahu ban ke Tapaktaa hogaa

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

jo musaafir bhi tire kuche se guzraa hogaa
apni nazron ko bhi divaar samajhtaa hogaa

har taraf hain khaana-barbaadi ke manzar be-shumaar
kuchh Thikaana hai bhalaa is jazba-e-taamir kaa

main baDaa ho gayaa huun magar bachpanaa
mere dil se kabhi bhi gayaa hi nahin

shaayad zabaan pe qarz thaa ham ne chukaa diyaa
khaamosh ho gae hain tujhe ham pukaar ke

shor-sharaaba rahtaa thaa jis aangan mein
aaj vahaan se bas khaamoshi nikli hai

baDi hasrat se insaan bachpane ko yaad kartaa hai
ye phal pak kar dobaara chaahtaa hai khaam ho jaae

tere kahne se chup nahin huun main
jaantaa huun ki bolnaa kab hai

kyaa ajab log the guzre hain baDi shaan ke saath
raaste chup hain magar naqsh-e-qadam bolte hain