dard aasaani se kab pahlu badal kar niklaa — Haseeb Soz

tu ek saal mein ik saans bhi na ji paayaa
main ek sajde mein sadiyaan kai guzaar gayaa

ye bad-nasibi nahin hai to aur phir kyaa hai
safar akele kiyaa ham-safar ke hote hue

yahaan mazbut se mazbut lohaa TuuT jaataa hai
kai jhuTe ikaTThe hon to sachchaa TuuT jaataa hai

meri sanjida tabiat pe bhi shak hai sab ko
baaz logon ne to bimaar samajh rakkhaa hai

ye intiqaam hai yaa ehtijaaj hai kyaa hai
ye log dhuup mein kyuun hain shajar ke hote hue

vo ek raat ki gardish mein itnaa haar gayaa
libaas pahne rahaa aur badan utaar gayaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

mere sukun-e-qalb ko le kar chale gae
aur iztiraab-e-dard-e-jigar de gae mujhe

sukut tark-e-taalluq kaa ik garaan lamha
banaa gayaa hai sadaaon kaa silsila mujh ko

ghar ke dukhDe shahr ke gham aur des bides ki chintaaein
in mein kuchh aavaara kutte hain kuchh ham ne paale hain