ye jazba-e-talab to miraa mar na jaaegaa — Hayat Lakhnavi

ab dilon mein koi gunjaaish nahin milti 'hayaat'
bas kitaabon mein likkhaa harf-e-vafaa rah jaaegaa

silsila khvaabon kaa sab yunhi dharaa rah jaaegaa
ek din bistar pe koi jaagtaa rah jaaegaa

khudaa ke vaaste mohr-e-sukut toD bhi de
tamaam shahr tiri guftugu kaa pyaasaa hai

muddaaa ham apnaa kaaghaz par raqam kar jaaeinge
vaqt ke haathon mein apnaa faislaa rah jaaegaa

har sadaa se bach ke vo ehsaas-e-tanhaai mein hai
apne hi divaar-o-dar mein gunjtaa rah jaaegaa

chehre ko tere dekh ke khaamosh ho gayaa
aisaa nahin savaal tiraa laa-javaab thaa

thi hausle ki baat zamaane mein zindagi
qadmon kaa faasla bhi yahaan ek jast thaa

be-zaar hain jo jazba-e-hubb-ul-vatani se
vo log kisi se bhi mohabbat nahin karte

aql kahti hai na jaa kucha-e-qaatil ki taraf
sarfaroshi ki havas kahti hai chal kyaa hogaa

ye bhi khud ko hausla dene kaa hiila hai ki main
ungliyon se likh rahaa huun chaar su laa-taqnatu

main ne dafnaae vaaldain apne
mujh se puchho ki hausla kyaa hai

haalaat chaahe jo bhi hon dil to baDaa rakho
ye vaqt kaT hi jaaegaa tum hausla rakho