aayaa bhi koi dil mein gayaa bhi koi dil se — Hijr Nazim Ali Khan

kuchh khabar hai tujhe o chain se sone vaale
raat bhar kaun tiri yaad mein bedaar rahaa

us bazm mein jo kuchh nazar aayaa nazar aayaa
ab kaun bataae ki hamein kyaa nazar aayaa

kabhi ye fikr ki vo yaad kyuun kareinge hamein
kabhi khayaal ki khat kaa javaab aaegaa

ai hijr vaqt Tal nahin saktaa hai maut kaa
lekin ye dekhnaa hai ki miTTi kahaan ki hai

haan haan tumhaare husn ki koi khataa nahin
main husn-e-ittifaaq se divaana ho gayaa

kahegi hashr ke din us ki rahmat-e-be-had
ki be-gunaah se achchhaa gunaah-gaar rahaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

mohabbat karne vaale dard mein tanhaa nahin hote
jo ruThoge kabhi mujh se to apnaa dil dukhaaoge

kunj-e-hairat se chale dasht-e-ziyaan tak laae
kaun laa saktaa hai ham dil ko jahaan tak laae

tum ne kyuun dil mein jagah di hai buton ko 'saabir'
tum ne kyuun kaaba ko but-khaana banaa rakkhaa hai

pahli nazar bhi aap ki uff kis balaa ki thi
ham aaj tak vo choT hain dil par liye hue