sila diyaa hai mohabbat kaa tum ne ye kaisaa — Indira Varma

tumhaare binaa sab adhure hain jaanaan
sabaa phuul khush-bu chaman raushni rang

ye shafaq chaand sitaare nahin achchhe lagte
tum nahin ho to nazaare nahin achchhe lagte

yahi fasaana rahaa hai junun ke sahraa mein
kabhi firaaq ke qisse kabhi visaal ki baat

vaqt khaamosh hai TuuTe hue rishton ki tarah
vo bhalaa kaise mire dil ki khabar paaegaa

shikasta-dil andheri shab akelaa raahbar kyuun ho
na ho jab ham-safar koi to apnaa bhi safar kyuun ho

kitaab-e-zist kaa unvaan ban gae ho tum
hamaare pyaar ki dekho ye intihaa saahab

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

dil ke muaamale mein natije ki fikr kyaa
aage hai ishq jurm-o-sazaa ke maqaam se

mohabbat tark ki main ne garebaan si liyaa main ne
zamaane ab to khush ho zahr ye bhi pi liyaa main ne

tarab-zaaron pe kyaa guzri sanam-khaanon pe kyaa guzri
dil-e-zinda mire marhum armaanon pe kyaa guzri

jurm-e-ulfat pe hamein log sazaa dete hain
kaise naadaan hain shoalon ko havaa dete hain