ab ham bhi sochte hain ki baazaar garm hai — Iqbal Azeem

ai ahl-e-vafaa daad-e-jafaa kyuun nahin dete
soe hue zakhmon ko jagaa kyuun nahin dete

junun ko hosh kahaan ehtimaam-e-ghaarat kaa
fasaad jo bhi jahaan mein huaa khirad se huaa

manzil to khush-nasibon mein taqsim ho chuki
kuchh khush-khayaal log abhi tak safar mein hain

jab ghar ki aag bujhi to kuchh saamaan bachaa thaa jalne se
so vo bhi un ke haath lagaa jo aag bujhaane aae the

baarhaa un se na milne ki qasam khaataa huun main
aur phir ye baat qasdan bhuul bhi jaataa huun main

guftugu nazr-e-ehtiyaat hui
qabl is ke ki ibtidaa karte

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maango samundaron se na saahil ki bhiik tum
haan fikr o fan ke vaaste gahraai maang lo

gulaabon ke honTon pe lab rakh rahaa huun
use der tak sochnaa chaahtaa huun

haae vo zindagi-fareb aankhein
tu ne kyaa sochaa main ne kyaa samjhaa

ham hain tahzib ke alam-bardaar
ham ko urdu zabaan aati hai