junun ko hosh kahaan ehtimaam-e-ghaarat kaa — Iqbal Azeem

ab ham bhi sochte hain ki baazaar garm hai
apnaa zamir bech ke duniyaa kharid lein

ai ahl-e-vafaa daad-e-jafaa kyuun nahin dete
soe hue zakhmon ko jagaa kyuun nahin dete

manzil to khush-nasibon mein taqsim ho chuki
kuchh khush-khayaal log abhi tak safar mein hain

jab ghar ki aag bujhi to kuchh saamaan bachaa thaa jalne se
so vo bhi un ke haath lagaa jo aag bujhaane aae the

baarhaa un se na milne ki qasam khaataa huun main
aur phir ye baat qasdan bhuul bhi jaataa huun main

guftugu nazr-e-ehtiyaat hui
qabl is ke ki ibtidaa karte

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne