din guzarte jaa rahe hain aur hujum-e-khush-gumaan — Jamal Ehsani

isi ik baat par hai ittifaaq-o-ikhtilaaf us se
use aaina aur mujh ko piyaala achchhaa lagtaa hai

hazaar tarah ke the ranj pichhle mausam mein
par itnaa thaa ki koi saath rone vaalaa thaa

jo dil ke taaq mein tu ne charaagh rakkhaa thaa
na puchh main ne use kis tarah sitaara kiyaa

kisi bhi vaqt badal saktaa hai lamha koi
is qadar khush bhi na ho meri pareshaani par

vo log mere bahut pyaar karne vaale the
guzar gae hain jo mausam guzarne vaale the

vo bhi milne nai poshaak badal kar aayaa
main jo kal pairahan-e-khaak badal kar aayaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

pyaaso raho na dasht mein baarish ke muntazir
maaro zamin pe paanv ki paani nikal paDe

tire baghair tere intizaar se thak kar
shab-e-firaaq ke maaron ko niind aai hai

sadiyon tak ehtimaam-e-shab-e-hijr mein rahe
sadiyon se intizaar-e-sahar kar rahe hain ham

tamaam umr yahaan kis kaa intizaar huaa hai
tamaam umr miraa kaun intizaar karegaa